Pavel Durov bir oy ichida “VKontakte”dan ketadi

"VKontakte” ijtimoiy tarmog‘i asoschisi Pavel Durov kompaniyaning bosh direktori lavozimini bir oy muddat ichida tark etishi mumkin. Bu haqda "RIA Novosti” saytidagi ma’lumotga asoslanib Look at Me xabar qilmoqda.

Nashr bergan ma’lumotlarga ko‘ra, Durovning o‘z vazifasidan ketishi masalasi ijtimoiy tarmoq aksionerlarining navbatdan tashqari yig‘ilishida hal etilishi ehtimoli bor. Mazkur yig‘ilish aksionerlardan birining tashabbusi bilan tashkillashtirilmoqda. Taxminlarga ko‘ra, mazkur tadbir uzog‘i bilan joriy yilning fevralida o‘tkaziladi.

"VKontakte”ning vakillari hozircha bu kabi xabarlarga rasmiy izoh berishgani yo‘q.

Avval xabar qilganimizdek, Pavel Durov 2014-yilning 24-yanvarida "VKontakte”dagi o‘z ulushini "Megafon” bosh direktori Ivan Tavringa sotib yubordi. Garchi uning ketishi haqida xabarlar avvaldan chiqqan bo‘lsa-da, shu paytgacha rad etib kelinmoqda.