“Migom” pul o‘tkazmalari tizimi litsenziyasi olib qo‘yildi

Rossiya Federatsiyasi Markaziy banki 18-mart kuni "Migom” YoAJ nobank kredit tashkilotidan bank operatsiyalarini amalga oshirish litsenziyasini qaytarib oldi. Bu haqda "RIA Novosti” xabar berdi.

Bankning ma’lum qilishicha, bunga bank faoliyatini tartibga soluvchi federal qonunlar va MB normativ hujjatlariga zid holda "Migom” YoAJ kapitalining 2 foizdan kam bo‘lishi, kreditorlarning pul majburiyatlari bo‘yicha talablarini qondirishga noqobilligi sabab bo‘lgan.

Rossiya Federatsiyasi pul o‘tkazmalari bozorining 2—3 foizini egallab turuvchi "Migom”ning muammolari o‘tgan yil kuzda boshlangan bo‘lib, ular tizim asoschisi "Yevrotrast” banki bilan bog‘liqdir. 2013-yilning so‘ngida tizim nafaqat Rossiyada, balki Ukraina, Tojikiston va O‘zbekistonda ham uzilishlar bilan ishladi. Fevralning boshida "Migom” o‘tkazmalar tizimi Moskvada o‘z ishini to‘xtatdi va Ukrainadagi faoliyatini tugatdi.

Rossiya markaziy banki 11-fevral kuni "Yevrotrast” bankining bank operatsiyalarini amalga oshirish huquqini beruvchi litsenziyasini qaytarib oldi. Bunga bank noyabr oyidan boshlab jismoniy shaxslarning omonatlarini qabul qilishni to‘xtatgani sabab bo‘ldi. "Yevrotrast”ning tushuntirishicha, ushbu qaror Rossiyadagi iqtisodiy ahvolning yomonlashuvi va inqirozoldi taxminlar bilan bog‘liq.