ФИФА Қатардаги 2022 йилги жаҳон чемпионатига тайёргарлик ишларидаги меҳнат шароитлари яхшиланганидан кўнгли тўлди

ФИФА Қатардаги 2022 йилги жаҳон чемпионатига тайёргарлик ишларидаги меҳнат шароитлари яхшиланганидан кўнгли тўлди. ФИФА бош котиби вазифасини бажарувчи Маркус Каттнернинг бу ҳақда айтган сўзлари ФИФА расмий сайтида келтирилди.

2014 йилда ФИФА ва Қатар ҳукумати футбол бўйича 2022 йилги жаҳон чемпионати объектларини барпо этишда иштирок этувчиларнинг меҳнат, уй-жой шароитлари ва маошлари бўйича меъёрларни белгилаган қўмитани таъсис этганди. Айни пайтда мамлакатда 5 та стадион қурилиши давом этмоқда.

“Айни пайтга келиб Қатарнинг жаҳон чемпионатига тайёргарлик ташкилий қўмитаси томонидан амалга оширилган ишлар таҳсинга сазовордир. Биз объектлар қурилишида иштирок этаётган ишчиларнинг меҳнат, уй-жой шароитлари ва маошлари яхшиланганидан кўнглимиз тўлди. Биз Қатар ҳукуматини меҳнат ислоҳотларини миллий даражада тезлаштиришга чақирмоқдамиз, токи шундай меҳнат стандартлари мамлакатнинг барча қурилиш компаниялари учун ҳуқуқий томондан бириктириб қўйилсин”, деб айтди Каттнер.

Қатарда ёзда об-ҳаво жуда иссиқ бўлиши туфайли 2022 йилги жаҳон чемпионатини 21 ноябрдан 18 декабргача ўтказишга қарор қилинганди.