Durov “VKontakte” bosh direktori lavozimidan ketishini e’lon qildi

“VKontakte” ijtimoiy tarmog‘i bosh direktori Pavel Durov egallab turgan bosh direktor lavozimini tark etadi. Buni u ijtimoiy tarmoqdagi o‘z sahifasida ma’lum qildi.

“O‘tgan yilning o‘rtasida texnik direktor lavozimidan ketgan akamdan keyin, men ham “VKontakte” bosh direktori lavozimidan bo‘shayman”, – deb yozadi Durov.

“2013-yilning aprelida “VKontakte” aksionerlari tarkibi o‘zgarishidan keyingi voqealar natijasida kompaniya boshqaruvida bosh direktorning harakatlari erkinligi sezilarli darajada qisqardi. Bir paytlari bizning ijtimoiy tarmoq asosiga qo‘yilgan tamoyillarni ushlab turish borgan sari qiyinlashmoqda”, – deya ta’kidladi u.

Shuningdek, Pavel Durov o‘zini “qo‘llab-quvvatlagan va ilhomlantirgan” barcha foydalanuvchilarga minnatdorchilik izhor etdi.

Durov o‘z bayonotiga “Men bundan keyin ham “VKontakte” hayotida asoschi huquqlari bilan ishtirokimni davom ettiraman, biroq yangi shartlardagi rasmiy lavozimlar men uchun qiziqarli emas”, – deya yakun yasaydi.

Yangi bosh direktorni tanlash masalasi shu haftada bo‘lib o‘tadigan direktorlar kengashi yig‘ilishida “VKontakte” aksiyadorlari tomonidan muhokama etiladi. Bu haqda ijtimoiy tarmoq aksiyalarining 48 foiziga ega bo‘lgan United Capital Partners (UCP) jamg‘armasi xabar bergan.